• Woher kommt eigent­lich das Wort »Gässje«?
• Wann wurde das Wort »Gässje« zum Ersten­mal benutzt?
• Darf man zu einem »Gässje« sagen, auch wenn deren Eltern nicht in Bad Kreuz­nach geboren sind?

Mit freund­li­chen Grüßen

Muschs laut leese, dann kimmsche dehin­ner,
hinner unser Kreiz­nacher Platt!

Ich schreiwe Lautschrift un wenn’s eem dann im Ohr erschallt, das Wort odder der Kreiz­nacher Satz, dann kammers ve’schdehn – wemmer Kreiz­nache­risch ve’schdehn kann. (lees mei Schdig­gel­cher unner www.hombes.wordpress.com). Alles e’bissje kompli­zi­irt, doch wemmer will un mei Schdig­gel­cher geere leese duut, dann kammers aach!

Also e’Unnerrichtsschdunn fore Kreiz­nacher, der nit weeß obber eene is:

Kreiz­nacher simmer all di do wohne, das e’mol vorne­wegg!

Alde Kreiz­nacher, mir saan. (Alde, weech mit d geredd un bei dere Alt, wollt ich nit im Bett leije! Do schreiwe merr Alt mit t !) Unser Schbrach is vumm Maul her wandelba (ohne r!) Mit dene Buchsch­daw, di mir fortlosse, kennde ganze Neecher­sch­dämm ihr Schbrach uffbaue!

Also weider:

E’alde Kreiz­nacher is eener, dem sei Vadder un sei Mudder (es bescht alle zwee) Kreiz­nacher sinn. Do is di Mundart dann nit ve’hunzt! Wenn der een vun Kreiz­nach is un di Mudder ve’leicht aus Hamburch odder Münche, dann kannsche derr vorsch­dell wi der aam Bub Kreiz­nache­risch redde duut!!

Also es is es Bescht, wenn’se alle zwee vun do sinn, annerscht werrd „gegerrt“, das heeßt, es werrd e’Mischmatsch geredd zwische Kreiz­nache­risch, Kölsch odder Hambur­ge­risch. Hosche mich ve’schdann?

Jetz kimmt de zwedde Deel vumm Ganze:

Gässjer hot’s in Kreiz­nach frihjer ni gebb!

Mir hadde nor kleene Gässjer (kleine Straßen), wo di kleene odder di aame Leit drin gewohnt honn. Di awwer honn Kreiz­nache­risch geredd!!! Di konde frihjer aach nit schreiwe – nor redde konnde’se un so is unser Kreiz­nacher Mundart „verbal“ unner di Leit komm! De eerscht nor dorch di kleene Leit, di in de „Gässjer“ un in de Gasse gewohnt honn.

Di feine Leit, di draus im Badeweth „Badewörth“ gewohnt honn, di konnde leese un aach richdich schreiwe, di honn nor e’abgemildert Mundart geredd – mit Knibbel drin!

Also als Gässjer hot sich frihjer in Kreiz­nach keener gesihn, denn er hätt jo miss zugewwe, dass’er vun aame Leit komm wär, ja un das wollt keener.

Di Briider aus de Gässjer, di ware raulich un mit Vorsicht ze geniiße. Ja un weil di so „gewehn­lich“ ware, in ihrem Umgang mit annere Leit, honn di Leit uffem Land di Kreiz­nacher „ generell“ als Gässjer bezei­chend.

Das wa e’Schenn– odder wi merr heit seet e’Schimpfwort!

Wehje­dem, das hätt e’mol eener iwwer mich uffem Land gesaat!
Der hätt kenne sei Zähn suche gehen!

Heit is alles annerscht, wi alles uff dere bugge­lich Welt! Heit siht merrs als Ehr aan e’“Gässje“ ze sein.

E’Mann odder e’Bub aus’em Volk, em kleene, dene vun unne!

Wenn heit eener seet er wär e’Gässje, dann meent’er nor, dass er e’Kreiznacher is, was awwer de Naal nit uffem Kopp tifft

So mei liiwer Kreiz­nacher, kannsch ruhich saan wärsch aach e’Gässje, nor halt kee alde Kreiz­nacher, das bische nit. Un wemmer uns e’mol sihn , dann ve’zehl ich derr den alde Witz aus meiner Juchend vum Reiner Makko.

Bis dann e’mol griißt Dich